Ilaw

Isinulat ni Patrick Familara

Noo’y hagulhol na di marinig

Sa bayan na ang ilaw ay walang salig

Pag-aari kung ituring ito ng nakararami

Sa pag-aaruga nito tayo rin ay namamalagi

Sa mahabang panahon, ang ilaw ay naghirap

Liwanag nito ay nasakluban ng pighati mula alapaap

Kahit anong lakas ng tinig ay di sasapat

Tila bulong lang sa hangin ang kanyang mga hiyaw

Sa paglipas ng panahon, ang ilaw ay namulat

Tama na, ang sumbat sa bawat pagyurak

Nagsimulang maghangad na matutong magsulat,

Magbasa at makapag-aral hinangad para sa lahat.

Pagkapantay-pantay ang sunod na hiniyaw

Nitong ilaw na ang nais naman ay makagalaw

Magkaroon ng papel sa bayang ginigiliw

Boses ay madinig ng madla sa saliw

Sa mga sumonod na taon ang ilaw ay ganap nang nakalaya

Mula sa kahon ng kung saan s’ya nanahan

Liwanag nito ay nagsimulang madama at matanaw 

Sa mga lugar na noo’y para lamang sa mga lakan

Kung noong araw ang ilaw ay walang magawâ

Ngayon nga ay tila ba sila na ang gumágawa

Mula sa tahanan hanggang sa mga industriya

Sila na nga ang bida sa ating pamilya

Pawis at pagod ang alay nila sa atin

Para sa kasaganahan, tayo ay di mabitin

Ginagawa ang lahat para ikabubuti

O ilaw, ikaw nga ang bagong bayani

Tunay ngang malayo na ang narating nito ilaw

Mula sa pagiging simpleng may bahay 

Ngayon nga sila’y nangingibabaw

At sa pag-unlad ng bayan ang ilaw ay siyang tulay.

___________________________

Week of the Quarter/Grading Period 4th Quarter Week 7

MELC: Nasusuri ang karanasan at bahaging ginampanan ng mga kababaihan sa pagkakapantay-pantay, pagkakataong pang ekonomiya at karapatang Pampolitika